SEKRETO SA SULPICIO
Unsa pa may ubang tinagoan sa Sulpicio Lines nga wa nila itug-an ngadto sa publiko? Unsa may nasud sa ilang bakukang nga wa man itug-an ngadto sa Philippine Coast Guard (PCG) nga duna diay silay kargamento nga 10 ka metrikas toneladas nga pesticide? Di pa ba diay paigo nga namatyan na silag gatosan ka mga pasahero sa nalunod nga MV Princess of the Stars?
Nganong nakaako man intawon sila paglawog sa mga divers gikan sa PCG, Philippine Navy, US Navy ug pribado nga mga kahugpongan sa makahilo nilang kargamento? Itom na ba gyod diay kaayo ang ilang kasingkasing nga gusto pa silang madugangan ang mga naangin sa ilang bulilyaso?
-o0o-
Mao ba ni hinungdan nganong tak-om kaayo ang Sulpicio sa unang mga takna sa katalagman? May mas makalilisang pa ba diay silang tinagoan nga wa man sila magtagad pagpahibawo sa mga kapamilya sa ilang pasahero bisan nahibawo na sila nga naapiki nang labing dako nilang barko?
Makapanimbawot ba sa balhibo nila nga mga sekreto ang hinungdan nganong labihang dugaya nilang nakapalihok sa ilang mga barko pagtabang sa nangalumos nang mga pasahero? Nadat-ogan ba sila sa naghiting-hiting nga giyak-an nilang mga tinagoan nga mora silang manok nga naputlan og ulo nga wa mahinultol unsaon pagtubag ang mga pangutana ug unsaon pag-atiman sa desperado ug nagbangotan mga kapamilya sa mga biktima?
-o0o-
Wa katabang sa kawsa sa kagamhanan pagpasalig sa katawhan nga di matagoan hangtod sa hangtod ang mga tinagoan sa Sulpicio ang kalit ug kahibulongan nga pagtak-op sa Board of Marine Inquiry (BMI) sa ilang imbestigasyon sa pagkalunod sa Princess of the Stars. Nahadlok ba silang madunggan sa media ang makadaot nga mga kasayuran nga lisod nang bakwion kon magkonsabo na sab sila, sama sa naandan, sa pag-areglo sa kontrobersiya?
Nasakpan na sa BMI nga nahugno nang sistema sa komunikasyon sa Sulpicio tungod sa bagyo. Ug nga cell phones na lay nagsumpay sa mga tripulante ug sa kompaniya. Unsa pa may bulilyaso nga gusto nilang tapin-an?
-o0o-
Karong gisugdan na sa kagamhanan pagronda ang container yard sa Sulpicio sa pantalan sa Manila nga nisangpot sa pagkasakmit sa 7,000 ka sako sa giingong smuggled nga asukar, tinud-on na ba pagsusi ang ilang mga transaksiyon?
Nakahukom na bang kagamhanan pagpahamtang sa kinatibuk-ang gibug-aton sa balaod batok sa Sulpicio human sa giingong pila na ka dekada nga pagpabaya? Sampolan bang Sulpicio aron pagmatuod nga wa nay mga magpapatigayon, bisan unsa nila kadako ug kagamhanan, nga molabaw sa balaod?
O, sama sa ilang gihimo sa ubang dagkong mga patigayon nga nakatilaw na sa ilang kabangis, igo lang gihudlat nga laksian sa prangkisa ug gukdon hangtod sa kinatumyan sa kalibotan aron lang, nakatag-an mo, panguwartahan? [30] leo_lastimosa@abs-cbn.com
No comments:
Post a Comment