Arangkada of Leo Lastimosa for June 26, 2008

          KUWARTA O KONSIYENSIYA

 

          Sa pagsugod pa lang sa imbestigasyon sa Board of Marine Inquiry sa pagkalunod sa MV Princess of the Stars, nagsinukmatay nang Philippine Coast Guard (PCG) ug ang tag-iya sa barko, nga gituohang pasiuna sa way kinutobang tinulisokay pagpahiyos sa ilang masig ka responsibilidad sa katalagmann:

·        Ang Sulpicio Lines, tag-iya sa nalunod nga barko, nagpalaban sa karaang lagda nga ang Philippine Coast Guard (PCG) maoy magbuot ug mogiya sa pagpalawig sa mga barko kon giisa ang public storm warning signal number one; apan

·        Ang PCG nisukmat sa Sulpicio nga giusab nang maong lagda sa niaging tuig ug gitugyan na ngadto sa kapitan ug tag-iya sa barko ang paghukom sa paglawig o paglihay kon dunay signal number one.

-o0o-

          Makauuwaw nang daan ang pagbinasolay sa duha ka institusyon, apan ang mas pait mao nga nakapatumaw ni sa mas dagkong mga eskandalo:

·        Kon tinuod ang pangangkon sa Sulpicio nga wa sila kahatagi og kopya sa bag-ong lagda, kinsa may laing nahibawo sa kausaban kon ang labing dakong kompaniya sa barko sa nasud way kalibotan ug nagmika ba lang diay ang kagamhanan pagsangyaw sa kausaban?; o

·        Kon namakak ang Sulpicio, asa man kutob ang ilang pangulipas aron lang pagpanalipod sa ilang patigayon inay pagtinuod sa pag-angkon sa responsibilidad ug pagpangayo og pasaylo sa tanang nahasol sa sayop nilang hukom pagsugal sa kabtangan ug kinabuhi sa ilang mga pasahero?

-o0o-

          May sukaranan ang pagkuwestiyon sa pagtugyan sa kagamhanan ngadto sa mga kompaniya sa barko sa gahom pagbiyahe bisan may bagyo.  Kay gipahimutang nila ang mga kapitan ug mga tag-iya sa barko sa di kasinahan nga posisyon pagtimbang-timbang unsay ilang palabihon—ang patigayon o ang kaluwas sa ilang mga pasahero.

          May sukaranan ang kahadlok nga ang mga magpapatigayon, suma sa napamatud-an sa makausa pa sa pagkalunod sa Princess of the Stars, kasagaran kon di man kanunay nga mopalabi sa pagpaburot sa ilang mga bolsa kay sa pagpatigbabaw sa ilang obligasyon sa kinabag-an ug katilingban.

-o0o-

          Gihangop sa mga kapamilya sa wa pa igkita nga mga pasahero sa nalunod nga barko ang pagsugot sa management sa Sulpicio Lines nga idiretso sa Sugbo, inay pahapiton pa sa Manila, ang mga patayng lawas ug survivors nga makit-an sa Romblon, Masbate, Quezon ug kasilinganang mga lalawigan.  Nahugno hinuon sila tungod sa pagdumili sa Sulpicio ug bisan sa PCG pagtino kanus-a dad-on ang unang hugna sa mga patayng lawas dinhi.

          Samtang nagmalampuson si Cebu City Mayor Tomas Osmena pagkumbinser sa Malakanyang pagbakwi sa nahaunang kamandoan pagda sa mga biktima ngadto sa kaulohan, mag-atubang siya karon sa dakong hagit pag-andam sa mga tambalanan ug mga punerarya pag-atiman sa gatosan ka mga patayng lawas, nga kinahanglang ilhon ug hipuson.  [30]  leo_lastimosa@abs-cbn.com