Arangkada of Leo Lastimosa for June 15, 2008

       BITAY SI KOBE

 

       Tungod sa makauuwawng kapildehan sa Los Angeles Lakers, human sa makasaysayanong pagpapas sa Boston Celtics sa 24 puntos nilang labaw sa 1^st quarter sa Game 4 sa NBA finals, mouyon ka nga di nang kapangangkon si Kobe Bryant nga siyay sunod nga Michael Jordan.  Kon may uwaw siya, angayng ibalik ang iyang karaang numero "8" kay ang iyang bag-ong numero "24" gihubad man nga iyang pangangkon nga labaw pa siyang Jordan.

       Ang paghagsa sa Lakers ubos sa iyang liderato nagmatuod nga di pa siya andam pagdaog og korona nga wa si Shaquille O'Neal.  Gipasanginlan ang linghod niyang kaubanan nga nikaging sa labing una nilang finals.  Ang tinuod mao nga, gawas sa iyang 36 puntos sa Game 3, si Kobe maoy labing dakog hagsa.

-o0o-

       Nipasumbingay si Kobe nga "lubay" ang ilang sentro, ang Katsila nga si Pao Gasol.  Apan way makalalis nga mas lubay ang Ustralyano nga sentro ni Jordan sa Chicago Bulls niadto, si Luc Longley.  Makapangangkon hinuon ang mga dumadapig ni Kobe nga, lahi ni Jordan, wa siyay Scottie Pippen.  Bisan duna siyay Lamar Odom ug Derek Fisher.

       Di hinuong kapanagang si Kobe sa tokar-tokar niyang duwa.  Nakandadohan siya sa depensa sa Celtics.  Nikuyaig man gani dihang si Paul Pierce ray nidutdot niya sa second half sa Game 4.  May off-nights sab si Jordan sa regular season ug bisan sa unang mga hugna sa playoffs.  Apan way makalimod nga gidominahan gyong Jordan ang matag usa sa iyang mga duwa sa finals.

-o0o-

       May kahigayonan pa hinuon si Kobe pagmatuod nga mas maayo pa siyang Jordan.  Kon iyang dag-on ang tanang nahibiling tulo ka duwa ug sakmiton ang tam-is nga kampeyonato.  Samtang wa pay team nga nakabangon gikan sa 3-1 nga alkanse, may kahigayonan si Kobe paghimo og kasaysayan.

       Apan bisan ang lunod-patay nga fans sa Lakers di motukol kon makuha sa Celtics ang kampeyonato.  Napamatud-an nilang Kevin Garnett, Ray Allen, Pierce ug kaubanan nga silay mas hinog, mas determinado ug mas angayan sa kadaogan.  Gawas pa, mas batan-on ang Lakers ni Kobe.  Mas daghang kampeyonato pang nagpaabot nila.

-o0o-

       Alang sa lunod-patay nga fans sa Celtics, ang ika-17 nilang kampeyonato maoy labing tam-is.  Makuha ni 21 ka tuig human sa kataposan nilang taak sa finals.  Mabaraw sab nilang pagtumaw pagbalik sa Lakers nga maoy nidaog sa kataposang duha nila ka engkuwentro sa finals.

       Haom sab ning purung-purong ni Head Coach Doc Rivers nga, bisan karon pang kataak sa NBA finals, napamatud-ang mas takos kay sa mas hinog niyang kaatbang.  Gawas pa, ang laing korona sa Celtics makapugong sa pagsul-ob ni Lakers Head Coach Phil Jackson og ika-napu nga singsing, nga makapalabaw na niya sa gibalaan nga si Red Auerbach.  [30]  leo_lastimosa@abs-cbn.com