Arangkada of Leo Lastimosa for June 24, 2008

            KRIMINAL NGA TAK-OM

 

            Ang Sulpicio Lines niawhag sa mga sakop sa media sa di pagpataka og balita sa kasayuran nga di magikan sa opisyal nga tinubdan.  Ug ang opisyal nga tinubdan alang nila mao ra ang Philippine Coastguard (PCG).

            Duna koy balita alang sa Sulpicio.  Kon ang PCG ray saligan, abtan og siyam-siyam ang mga kapamilya sa kapin sa 800 ka pasahero sa nalunod nga MV Princess of the Stars.  Kay modugo pay bato kay sa PCG.  Diha na sila motarung paghatag og kasayuran mahitungod sa katalagman pagpahibawo na sa lokal nga mga opisyal sa Romblon nga nakit-an nilang nalunod nga barko duol sa Sibuyan Island.

            Ang PCG wa mag-inusara.  Ang Sulpicio nakigkonsabo pagluok sa kasayuran sa trahedya.

-o0o-

            Basaha ni ug di kong kabasol nimo kon magpaminti ka sa labihang kasuko inigkahibawo sa ilang pakauwaw:

·        Nagsugod pagkatap ang text messages, nga kasagaran nadawat sa mga kapamilya sa mga pasahero sa Princess of the Stars, sa pagkasangad ug pagtakilid sa barko niadtong Sabado sa udto;

·        Ang PCG ug Sulpicio labihang tak-oma, wa motubag sa mga tawag sa telepono ug dihang natsambahan sa mga nanawag namalibad og bisan unsang kasayuran, sa unang walo ka takna human nakadawat sa mensahe pakitabang sa mga tripulante sa naapiking barko; ug

·        Ang unang opisyal nga kasayuran sa trahedya giluwatan alas-8:45 sa gabii niadtong Sabado ni 2^nd Coast Guard District Commander Antonio Cuasito dihang na-interview ni Najib Cubio sa "Presinto 1512" sa DYAB Abante Bisaya.

-o0o-

            Ang PCG nihatag ning mosunod nga nagsukwahi nga mga detalye:

·        Nag-usab-usab ang oras nga ilang gihatag pagbiya sa barko sa pantalan sa Manila—inay alas-8 sa Biyernes sa gabii nahimo nang alas-8 sa buntag sa samang adlaw aron tingali pagpalig-on sa pangangkon nga wa pang kabuylo ang bagyong Frank niadtong higayona;

·        Si Cuasito nipahibawo nga nimando nang kapitan og "abandon ship" sa alas-4:45 sa hapon sa Sabado apan pagka Dominggo niangkon nga wa diay matino ang maong kasayuran atubangan sa pahibawo sa Centcom nga ang "abandon ship" nahitabo sa alas-5 na sa kadlawon; apan

·        Gipanghimakak ang duha ka pangangkon sa sulti sa naluwas nga tripulante, Reynato Lanoria, kinsa niingon nga nalunod ang barko alas-11:45 pa sa udto niadtong Sabado.

-o0o-

            Kon wa pa lang tagoi sa PCG ug Sulpicio ang pasiunang kasayuran sa pagkasangad sa barko, di lang gikan sa publiko kon dili gikan sab sa uban pang ahensiya sa kagamhanan, sama sa Philippine Air Force (PAF) nga makaabot sa barko sa way pagsungasong sa higanteng mga bawod, mas sayo untang malusad ang mga operasyon pagluwas sa mga pasahero.

      Apan salamat sa ilang kalangayan, ang unang rescue vessel sa PCG niabot Dominggo na sa hapon, wa nay bisan usang buhi o patay nga ilang naabtan.  [30]  leo_lastimosa@abs-cbn.com