Arangkada of Leo Lastimosa for June 21, 2008

          RAKET SA SULU

 

          Kon tuohan ang pangangkon sa kagamhanan, labihan kalig-on sa ilang mga ebidensiya batok ni Mayor Alvarez "Larin-Larin" Isnaji sa Indanan, Sulu.  Nga maoy ilang gipasanginlan nga utok sa pagdagit nilang Ces Drilon ug kaubanan.  Usa ka adlaw human nila pasidunggi si Isnaji ug iyang anak nga si Haider nga maoy mga bayani sa pagpalingkawas nilang Ces ug kaubanan.  Nga sa kalig-on sa ilang ebidensiya, gisalikway nila ang mga pasidaan nga magusbat ang relasyon tali sa kagamhanan ug sa MNLF, nga si Isnaji usa sa labing dagkong haligi.

          Matod ni DILG Secretary Ronaldo Puno andam silang mosagubang sa politikanhong mga implikasyon sa pagkiha ni Isnaji, nga kandidato pagka gobernador sa ARMM sa piniliay karong Agusto.  Si PNP Chief Avelino Razon nidason nga daghan silag mga saksi, mga opisyal sa kagamhanan ug kapolisan, nga molambigit sa mga Isnaji ug laing tulo ka paryente sa kidnapping.

-o0o-

          Segun ni Razon ang unang nahibaw-an sa kapolisan mao nga si "Larin-Larin" maoy pangu sa kidnappers sa ABS-CBN News team nga gipangulohan ni Ces ug sa ilang giya nga si MSU Professor Octavio Dinampo.  Dihang ilang nahibaw-an nga "Larin-Larin" maoy angga ni Mayor Isnaji, gipasudlan dayon nilag mga ahente sa intelligence ang negotiating team.  Mao ni hinungdan nga inay badlungon gidasig ni Puno si Isnaji pagpadayon sa sabutsabot.

          May sukaranan si Razon nga magduda ni Mayor Isnaji sukad sa sinugdanan.  Kay ang mga kidnappers nilang Ces maoy nagtudlo niya isip ilang representante.  Si Isnaji sab ang iyang gitumbok nga maoy namugos nga bayran ang P15 milyones nga ransom nga gidemanda sa kidnappers sa di pang udtong tutok sa adlaw sa pagpalingkawas sa mga bihag.  Gihulagway ni Razon ang anak nga si Haider nga nitabang ug nituman sa tanang sugo sa amahan nga mayor.

-o0o-

          Apan ang hulagway nga gipakita ni Razon sa giingong pagbolsa ni Isnaji sa dakong bahin sa ransom nga gibayad ngadto sa kidnappers makadaot sa kawsa sa kagamhanan.  Kay nakita uban sa mga Isnaji nga nag-ihap sa giingong P5 milyones nga ransom mao si Bise Gobernador Lady Ann Sahidulla, nga maoy gitudlo sa kagamhanan nga opisyal nga tigsabutsabot uban sa kidnappers.

          Kon tinuod ang pasangil ni Razon nga gibolsa ni Mayor Isnaji ang P3 milyones ug nga P2 milyones ray gihatag ngadto sa kidnappers, nganong wa man motukol si Sahidulla?  Kinsa mao pa man gani ang nangunay pagpahibawo sa media nga nibayad silag P2 milyones alang sa "board and lodging" sa mga bihag?  Di ba kapasanginlan lang hinuon nga way kalainan silang Isnaji ug Sahidullan?  Nga dakong pagpaka-aron-ingnon ang no ransom policy?  Ug nga mapalig-on lang hinuon ang pagduda nga ang lokal nga mga opisyal sa Sulu mopatong inay mobadlong sa ransom demands sa kidnappers?  [30]  leo_lastimosa@abs-cbn.com