Arangkada of Leo Lastimosa for June 23, 2008

          NAANDANG PANGIYUGPOS

 

          May sukaranan ang mga kapamilya sa mga pasahero sa nalunod nga MV Princess of the Stars nga mangutana:

·        Nganong sama sa naandan ang mga balita man sa radyo ug telebisyon ang unang nakapahibawo nila sa pagkalunod sa barko ug dugay man kaayong nakahatag og kasayuran ang kompaniya;

·        Nganong sama sa naandan gipalarga man sa Philippine Coastguard (PCG) ang barko bisan klarong mosubay ni agianan sa kusog nga bagyo; ug

·        Nganong sama sa naandan gawas nga dugay kaayong nakalusad ang PCG og search and rescue operations napakyas pa gyod pagpahibawo dayon sa Philippine Air Force, local government units ug ubang ahensiya sa kagamhanan nga makahatag unta og mas dinaliang tabang sa natanggong nga mga pasahero.

-o0o-

          Di makapanalipod ang Sulpicio Lines nga paspas lang gyong manimhot og balita mga sakop sa media.  Kay silay labing unang gipahibawo sa mga tripulante sa barko dihang nasangad sila sa Sibuyan Island sa Romblon.  Ug ilang gimbuhaton ang pagpahibawo dayon sa mga kapamilya sa mga pasahero ug mga tripulante sa di maayong panghitabo.  Kon wa pa silang kamatngon mas paspas nilang matuman kining maong obligasyon kon makigtambayayong sila sa mga sakop sa media.

          Apan, sama sa naandan, wa sila maggunok.  Ang PCG maoy labing unang nakahatag og kasayuran ngadto sa publiko pinaagi sa media.  Ang kadagkoan sa Sulpicio nihit kaayog gipuno.  Igo lang nipahibawo nga naputol nang ilang komunikasyon sa barko.  Wa katabang pag-iban sa kahingawa sa mga kapamilya sa mga biktima nga ang PCG ug Sulpicio wa magkarakara.  Morag kasarangan lang adlaw sa trabaho ug patigayon alang nila.

-o0o-

          Ang PCG ug Sulpicio angayng magsugod nag pasabot sa ilang panagkonsabo pagpalawig sa barko bisan bagyo:

·        Dihang gipalarga ang barko niadtong Biyernes, gikusukuso nang kadagatan sa Kabisay-an sa nagkakusog nga bagyo;

·        Ang kadagkoan sa PCG ug Sulpicio nasuhito nga ang kadagatan sa Romblon kahadlokan nang daan sa iyang kadagko ug kabangis bisan sa kasarangang panahon, unsa na kaha niadtong may nanungog nga bagyo; ug

·        Dakong bugalbugal sa nagmagul-anon nga mga kapamilya ang ilang pasahay—ang Sulpicio nilusot nga gitugotan sila sa PCG, samtang ang PCG motulisok sa wa pa igkitang kapitan nga maoy nipasalig nga makaabot ang barko sa Sugbo sa di pang bagyo.

-o0o-

          Nahibaw-an sa Central Command dinhi sa Sugbo, di sa PCG ni sa Sulpicio nga mao untay mas interesado naunsa nang barko, gikan sa kasundalohan sa Romblon nga may sipa nga silbato sa barko gahapon sa kadlawon—nga mahimong nagkahulogan nga gipabiya nang mga pasahero ug mga tripulante sa barko.

          Samtang nakigbugno sa higanteng bawod sa Romblon ang mga pasahero, unsa man diay gihimo sa kadagkoan sa PCG ug Sulpicio?  Nangiyugpos ug, sama sa naandan, nagpaabot nga mas unang molunga ang bagyo kay sa ilang pagpabaya?  [30]  leo_lastimosa@abs-cbn.com