ULIPON SA SULPICIO?
Angayng hangpon ang pahibawo sa Sulpicio Lines nga di lisudlisuron ang mga pamilya sa mga pasahero sa MV Princess of the Stars. Makaiban sa kabug-at sa pagbangotan sa kaparyentihan ang pasalig nga makobra nilang P200,000 nga bayad gikan sa Sulpicio bisan di matuman ang tanang makuti nga panginahanglan sa balaod:
· Bisan wa pa makit-i ni mailhi ang patayng lawas; ug
· Bisan wa pay usa ka tuig human sa pagkahanaw sa mga pasahero.
Di hinuong kapaabot ang Sulpicio nga hingpit na silang saligan sa mga tagtungod. Sa kadaghan na sa napaso sa nangaging mga pasalig, may sukaranan ang panagana nga ang saad usa ka butang, ang pagtuman sa saad laing butang. Di sab silang kalaom nga mahaylo ang tanan sa kasayon kobrahon sa P200,000 ug nga wa nay modangop sa mga hukmanan.
-o0o-
Di katabang sa kawsa sa Sulpicio pagkumbinser sa katawhan sa ilang kamatinud-anon ang laing duha ka kadudahan nilang lakang:
· Ang gikatahong pagbalibad nila sa mga paningkamot nga mapalutaw pagbalik ang nalunod nga barko, bisan may kahigayonan ug teknolohiya unta sa paghimo ini, tungod sa pasidaan sa ilang mga abogado nga di na silang kakobra sa hingpit nga bayad sa insurance; ug
· Ang taphaw nilang lusot nga wa silang kapahibawo dayon sa Philippine Coast Guard kay wa sab silang kahibawo nga makahilo diay ang ilang kargamento nga 10 ka tonelada nga pesticide dali ra kaayong nalup-og sa pag-insistir sa Del Monte Philippines nga gipahibawo nilang Sulpicio unsa kamakahilo ang kinompra nga endosulfan gikan sa Israel alang sa ilang plantasyon sa pinya sa Mindanao.
-o0o-
Angayng pasidunggan ang kadagkoan sa Dakbayan sa Sugbo sa dinaliang pag-angkon sa responsibilidad pag-atiman sa gatosan ka mga kabanay sa mga pasahero. Kay kon wa pa dayon matukod ang Action Center sa Abellana, ambot mahitsura pa ba kaha rong buhatan sa Sulpicio sa gikahadlokang kaguliyang tungod sa ilang pagpabaya.
Sa sinugdanan, dako ang risgo nga di mabayran ang dakbayan sa dakong gasto pagkaon ug ubang panginahanglan. Apan human sa tampong P1.5 milyones sa Malakanyang og P400,000 sa DSWD, tino nang di mapurdoy ang dakbayan. Gawas nga makapaningil sila sa Sulpicio human sa krisis.
-o0o-
Apan nganong kinahanglan mang ang dakbayan maoy mohimo sa gimbuhaton nga iya unta sa Sulpicio? Nganong wa may gihimo ang hingtungdang mga ahensiya sa kagamhanan dihang nagdumili ang Sulpicio pag-atubang sa mga tagtungod sa mga pasahero?
Nganong ang nasudnong kagamhanan may naghimo sa mga gimbuhaton nga iya unta sa Sulpicio, sama sa pag-ugkat, pag-ila ug paghipos sa mga patayng lawas? Nganong inay silotan ang Sulpicio sa iyang kaliboan ug usa na ka kalapasan, mora na man hinuon og iyang suluguon ang tibuok kagamhanan? Nga nahikawan na hinuon sa pangalagad ang ubang mas nagkinahanglan nga mga biktima sa samang katalagman? [30] leo_lastimosa@abs-cbn.com
No comments:
Post a Comment