UHAW SA PAG-ATIMAN
Sa kataposan, nakamatngon na gyong kadagkoan sa Sulpicio Lines Inc. ug Philippine Coast Guard (PCG) nga ang labing epektibong paagi pagpahilom sa sibaw nga mga reklamo batok sa pagpalarga sa MV Princess of the Stars bisan bagyo ug sa kalangay sa pag-ila sa survivors ug mga patayng lawas mao ang pag-atubang ug pagpanubag. Di ang pagtago.
Tuod man, natinuod ang ilang gikahadlokan. Gibahaan sa emosyonal nga mga yawyaw ug mga pangutana sa labing una nilang pag-atubang dinhi sa Sugbo ug sa kaulohan sa mga kapamilya sa mga pasahero sa nalunod nga barko. Apan nalikayan sang mas dakong kadaot. Nga hingpit nga mabuong ang ilang kadungganan atubangan sa masuk-anon ug nagbangotan nga mga biktima sa katalagman nga, makiangayon man o dili, gibasol ngadto nila.
-o0o-
Nakaseguro ko nga naibanan bisan dyutay lang ang kaguol sa mga namatyan ug ang kahingawa sa mga wa pa mahibawo hain ang ilang mga minahal sa kinabuhi, buhi man o patay. Bisan wa matubag ang tanan nilang pangutana, bisan wa masagang ang tanan nilang panukmat ug bisan wa matagbaw ang tanan nilang panginahanglan, ang katawhan mas kalma nang mosagubang sa nahibilin pang mga pagsuway sa umaabot nga mga adlaw.
Kay tinuod. Kon wa silay gitagoan, nganong magdumili man ang mga tagduma sa Sulpicio pag-atubang sa publiko? Nganong moatubang man tuod apan di motarung pagtubag sa mga pangutana ang kadagkoan sa PCG? Kon nagpadayon pa sa ilang pagtago ug pagtak-om, mosamot unta ang pagduda nga gituyo pagtago ang kamatuoran kay nagpalig-on na sa ilang depensa sa mga kaso nga posibleng ipasaka ug sa ilang pangangkon sa insurance.
-o0o-
Usa sa labing makiangayong tiyabaw sa mga kapamilya sa mga pasahero sa nalunod nga barko gitumong batok sa binuang nga desisyon sa pagpada sa survivors ug mga patayng lawas ngadto sa Manila. Bisan nahibawo ang tanang hingtungdan nga ang kasagaran kon di man ang tanan nila taga Sugbo. Mas binuang ang lusot sa management sa Sulpicio: Ang NBI Manila ray dunay kahimanan sa pag-autopsy sa mga patayng lawas.
Nakamenos ba sila sa katakos sa NBI ug kapolisan sa Sugbo? O mas nakamenos sila sa kaalam sa mga Sugbuanon? O, sama sa naandan, may mga taga Manila na sab nga gustong mo-papel? Kay mas maka-posing man sila uban sa mga biktima, bahala na kon makadugang lang sa kahasol sa mga biktima?
-o0o-
Maong daghang nahinangop dihang gisabonan ni Cebu City Mayor Tomas Osmena ang kadagkoan sa Sulpicio. Kay di pa igo nga naamong ang mga pasahero sa nalunod nilang barko, gipasagdan pa gyod ang dako nilang kauhaw sa labing lab-as ug tukmang kasayuran sa nagpadayong search and rescue operation.
Mahimong di katabang ang pagpangasaba. Apan kon mao ra ni makapapugwat nila pagtuman sa ilang trabaho, nganong dili? [30] leo_lastimosa@abs-cbn.com
No comments:
Post a Comment